കൊച്ചി: ന്യൂ ഇയര് ഗിഫ്റ്റ് ഓണ്ലൈന് സാമ്പത്തികതട്ടിപ്പുമായി ബന്ധപ്പെട്ട് സംസ്ഥാനത്തു റിപ്പോര്ട്ട് ചെയ്തത് അഞ്ചു കേസുകള്. കഴിഞ്ഞ രണ്ടു ദിവസത്തിനിടെ നാല് കേസുകള് തിരുവനന്തപുരത്തും ഒരു കേസ് കൊല്ലത്തും സൈബര് പോലീസ് രജിസ്റ്റര് ചെയ്തു. 5000 രൂപ വീതമാണ് സംഘം തട്ടിയെടുത്തത്.
പുതുവര്ഷത്തില് പ്രധാനമന്ത്രിയില്നിന്ന് എന്നപേരില് ന്യൂ ഇയര് ഗിഫ്റ്റ്, സ്ക്രാച്ച് കാര്ഡ് എന്നിവ അയച്ചുനല്കിയാണ് തട്ടിപ്പ്. തട്ടിപ്പുകാര് സ്ക്രാച്ച് കാര്ഡ് അടങ്ങിയ ലിങ്കുകള് സോഷ്യല് മീഡിയയിലൂടെ അയച്ചുനല്കും. ആ ലിങ്കില് ക്ലിക്ക് ചെയ്യുന്നതോടെ ഒരു നിശ്ചിത തുകയുടെ സമ്മാനം ലഭിച്ചതായി അറിയിപ്പ് ലഭിക്കും. ആ തുക അക്കൗണ്ടില് ക്രെഡിറ്റ് ചെയ്യുന്നതിന് പിന്നമ്പര് എന്റര് ചെയ്യാന് ആവശ്യപ്പെടുകയും നമ്പര് എന്റര് ചെയ്യുന്നതോടെ അക്കൗണ്ടിലെ പണം നഷ്ടപ്പെടുകയും ചെയ്യും.
ഇത്തരം തട്ടിപ്പിനെതിരേ പൊതുജനങ്ങള് ജാഗ്രത പാലിക്കണമെന്നും പിഎം ഗിഫ്റ്റ് എന്നപേരിലോ മറ്റു പേരുകളിലോ കേന്ദ്ര-സംസ്ഥാന സര്ക്കാരുകള് യാതൊരുവിധ സമ്മാനപദ്ധതികളും ഏര്പ്പെടുത്തിയിട്ടില്ലെന്നും സൈബര് പോലീസ് അറിയിച്ചു. ഇത്തരം ഓണ്ലൈന് സാമ്പത്തിക കുറ്റകൃത്യങ്ങള് ശ്രദ്ധയില്പ്പെട്ടാല് ഉടന്തന്നെ 1930 എന്ന നമ്പറില് ബന്ധപ്പെട്ടോ, https://cybercrime.gov.in എന്ന വെബ്സൈറ്റ് മുഖേനയോ സൈബര് പോലീസിനെ വിവരം അറിയിക്കണം.
E-paper LOGIN
LOGIN
